Մենք չենք արհամարհում ոչ ոքի, բայց նաեւ թույլ չենք տա ոտնահարել մեր շահերը
Posted on July 10, 2009, by admin, under Ելույթներ.
ՀՅԴ Բյուրոյի ներկայացուցիչ Հրանտ Մարգարյանի խոսքը Ստեփանակերտում կայացած խորհրդաժողովի ժամանակ
Մեծարգո պարոն նախագահ Լեռնային Ղարաբաղի Հանրապետության,
Գերաշնորհ սրբազան հայր,
Սիրելի ներկաներ,
Ամենքս մեր երկրի զավակներն ենք: Ապրել ու ապրում ենք պատմական, պատասխանատու ժամանակաշրջանում եւ պարտավոր ենք դիրքորոշում ունենալ այն հարցերի վերաբերյալ, որոնք ուղղակիորեն առնչվում են մեր պետության, մեր ժողովրդի ապագային:
Այս խորհրդաժողովը, հայության տարբեր հատվածների ու շերտերի ներկայացուցիչների այս կազմը մեր գերակա շահերը ձեւակերպելու, հնարավորինս միասնական դիրքորոշում ներկայացնելու բացառիկ առիթ է:
Աշխարհը, թշնամի, բարեկամ, միջնորդ երկրները, միջազգային հանրությունը պետք է իմանան, որ գործ ունեն հայության հավաքական կամքի հետ, եւ որ մենք պատրաստ ենք պայքարել երկնքի տակ մեր ինքնուրույն, արժանապատիվ տեղն ունենալու համար:
Մենք չենք արհամարհում ոչ ոքի, բայց նաեւ թույլ չենք տա ոտնահարել մեր շահերը:
Մենք պարտավոր ենք ապացուցել աշխարհին, որ արժանի ենք հարգանքի ոչ միայն մեր պատմությամբ, մշակույթով, քաղաքակակրթական արժեքներով, այլեւ ուրիշների կողքին հավասար իրավունքներով ապրելու նորօրյա կամքով ու ապագայի մտապատկերով:
Մենք կարող ենք նաեւ ուժ, վստահություն եւ հեռատեսություն հաղորդել մեր երկու պետությունների այսօրվա ու վաղվա ղեկավարներին, որ նրանք ամուր թիկունքով առաջնորդվեն բացառապես հայության ու Հայաստանի շահերով, գալիք սերունդների հանդեպ պատասխանատվությամբ:
Մենք հավաքվել ենք այստեղ` համայն հայության ուժերով, զոհողություններով ու զրկանքներով ազատագրված Լեռնային Ղարաբաղի Հանրապետության մայրաքաղաքում, ի նշան այն բանի, որ սա Հայաստան է եւ մնալու է Հայաստան:
Ի նշան այն բանի, որ հերոսական Արցախը շարունակում է մնալ ազգային շարժման դրոշակակիրը:
Ի նշան այն բանի, որ Ացախում իրագործվող բարեփոխումները, պետականաստեղծ աշխատանքը, իշխանություն-ժողովուրդ միասնությունը արժանի են ճանաչման ու ընդօրինակման:
Այո, մեր օրակարգում Արցախի հիմնախնդիրն է, հայ-թուրքական հարաբերությունները: Բայց սա չպետք է խանգարի գիտակցել, որ հարցերի հարցը, մեր գերագույն նպատակը Հայաստանի անկախ պետականությունն է, նրա լիարժեք կայացման, անվտանգության, զարգացման կարողականության ապահովումը: Առանց այդպիսի Հայաստանի վտանգվելու են մեր բոլոր ազգային-պետական հարցերը:
Չկա առանձին Ղարաբաղի հարց, չկան առանձին պատմական հարցեր, չկա առանձին հայ-թուրքական հարաբերություն, չկա առանձին ներքին քաղաքականություն: Ամեն բան ամբողջական է` ներկայով, անցյալով, ապագայով շաղկապված:
Եվ միայն այս ընկալմամբ, այս գիտակցությամբ ձեռնարկված քայլերով է հնարավոր ապահովել մեր արժանապատիվ տեղը աշխարհում: Եվ դարձյալ ու կրկին միամտությունն է կարծել, թե կարելի է զիջել ազգային որեւէ հարցում` չվտանգելով ամբողջը: Ընդհակառակը` մի հարցում զիջելը շղթայական զիջումներ է պարտադրելու այլ ասպարեզներում:
Այս առումով համոզված եմ` պաշտոնական Ստեփանակերտը, ընդհանրապես Արցախն ու արցախցին, հենց Արցախի շահերից մեկնելով, իրավունք չունեն անտարբեր լինել, թե ինչ է կատարվում հայ-թուրքական հարաբերությունների, ցեղասպանության միջազգային ճանաչման, Ջավախքի ինքնավարության իրավունքի, ընդհանրապես Հայ Դատի պայքարի հարթակներում:
Կրկնում եմ` մենք ամբողջի մասերն ենք եւ միայն այս մտասեւեռմամբ ու նպատակադրումով ենք կարողանալու ճիշտ ճանապարհ դուս գալ:
Այս գիտակցությունը պետք է դառնա մեր ժողովրդի քաղաքական, տնտեսական, հոգեւոր-մշակութային ընտրախավի կենսակերպը: Այս գիտակցությունը պետք է փոխանցվի երիտասարդությանը: Այս գիտակցությունը պետք է արմատավորվի հայ ժողովրդի լայն զանգվածների մեջ: Միայն այդպես մենք կկարողանանք լիարժեք հավաքականություն դառնալ ու հետապնդել մեր անհատական ու ընդհանրական նպատակները:
Մենք հավաքվել ենք քննարկելու մեր ժամանակի համար ազգային-պետական կարեւորագույն հիմնահարցերը, որովհետեւ վտանգներ ենք տեսնում, սխալ ընթացք ենք տեսնում, ինչը կարող է ծանր հետեւանքներ ունենալ:
Թուրքիան մեզ հետ խոսում է նախապայմաններով, միջազգային բոլոր հանդիպումներում ու բոլորի հետ քննարկում է Ղարաբաղի հարցը, Ալիեւը հրապարակայնորեն կարգավորման իր պատկերացումն է ներկայացնում:
Բնականաբար մենք էլ պարտավոր ենք կարելի ու անկարելի միջոցներով կանխել, սրբագրել սխալները, ուժ տալ միմյանց եւ ուժ առնել:
Բայց նաեւ հատուկ ուզում եմ շեշտել, որ սա միտինգ չէ, պոպուլիզմի տեղ չէ: Ընդահակառակը` մեր քննարկումները պետք է այս դահլիճին համապատասխան բարձրություն ունենան, իսկ եզրակացությունները լինեն իրատեսական ու ծանրակշիռ:
Թեեւ մյուս կողմից հայտնի ասույթ կա. «եղիր ռեալիստ`անհավանական նպատակներ ունեցիր»: Այս հակասական մտքի ճշմարտությունը մենք ապացուցել ենք հենց Արցախում:
Սիրելի բարեկամներ,
բացման այս խոսքում ես հատուկ չեմ ներկայացնում օրակարգային հարցերի վերաբերյալ Հայ Յեղափոխական Դաշնակցության ձեւակերպված մոտեցումները: Մեր նպատակը այդ չէ: Մեր նպատակը ներկայացուցչական այս խորհրդաժողովի ազատ քննարկումներն են եւ վստահությունը, որ մենք նույնն ենք, արել, անում ու անելու ենք նույնը` հանուն մեր ժողովրդի ու մեր անկախ պետականության:
Հաջողություն մեր աշխատանքներին
