RedStrong Red (default) BlueCalm Blue GreenFresh Green

Chose your color scheme.

Հրանտ Մարգարյան. Մենք նախագահի հետ չենք բանակցել, խորհրդակցել ենք

Posted on December 10, 2012, by , under Լուրեր, Հարցազրույցներ, Տեսաերիզներ.

 

Արդեն տեղեկացրել ենք, որ դեկտեմբերի 8-ին ՀՅԴ Բյուրոյի ներկայացուցիչ Հրանտ Մարգարյանը եւ Հայաստանի ԳՄ ներկայացուցիչ Արմեն Ռուստամյանը հանդիպել են ՀՀ նախագահ Սերժ Սարգսյանի հետ: Կայացել է երկարատեւ քննարկում ՀՅԴ առաջադրած յոթ կետանոց հիմնադրույթների վերաբերյալ:

Այսօր ՀՅԴ Բյուրոյում, լրագրողների հետ զրույցում ՀՅԴ Բյուրոյի ներկայացուցիչ Հրանտ Մարգարյանը տեղեկացրեց, որ նախագահի հետ կայացած հանդիպումը ՀՅԴ հերթական հանդիպումների շարքից էր: Նա ընդգծեց, որ թեեւ մինչեւ հիմա որեւէ քաղաքական ուժի հետ հանդիպման արդյունքները չեն հրապարակել, բայց ՀՀԿ եւ ՀՀ նախագահի հետ հանդիպման որոշ մանրամասներ կասի:
ՀՅԴ Բյուրոյի ներկայացուցիչը տեղեկացրեց, որ Սերժ Սարգսյանը դեմ է կառավարման խորհրդարանական համակարգին անցմանը եւ հայ-թուրքական արձանագրությունների վերաբերյալ կետին: Նախագահը նշել է, որ հայ-թուրքական արձանագրությունների մասով իր քայլը ճիշտ է եղել, իսկ ինչ վերաբերում է կառավարման խորհրդարանական համակարգին, նաը հայտարարել է, որ խնդիրը կառավարման համակարգը փոխելու մեջ չէ:

Նախագահական ընտրություններին ՀՅԴ-ի մասնակցության ձեւաչափի վերաբերյալ կուսակցությունում երկու տրամադրվածություն կա` կա’մ ունենալ սեփական թեկնածու, կա’մ կարողանալ համախմբվել միասնական թեկնածուի շուրջ: Չի բացառվում, սակայն, որ ՀՅԴ-ն առհասարակ չմասնակցի նախագահական ընտրություններին: Հայտնեց ՀՅԴ Բյուրոյի ներկայացուցիչ Հրանտ Մարգարյանը, բայցեւ հիշեցրեց, որ վերջնական որոշում կայացվելու է դեկտեմբերին կայանալիք ՀՅԴ արտահերթ Գերագույն ժողովում:

Նա եւս մեկ անգամ վստահեցրեց, որ կարեւորն իրենց առաջարկած յոթ կետերը իրականություն դարձնելն է, եւ երբ այս գաղափարն են առաջ քաշում, թող տպավորություն չստեղծվի, թե ՀՅԴ-ում նախագահի թեկնածու չկա: «Մենք թեկնածու չենք փնտրում, որ պաշտպանենք, մենք թեկնածու ունենք: Մենք մեր թեկնածուի մասին չենք խոսում, որովհետեւ համարում ենք, որ կարեւորը օրակարգային կետերն են»,- հայտարարեց ՀՅԴ Բյուրոյի ներկայացուցիչը:

Այն հարցին, թե որքանո՞վ է իրատեսական համարում, որ ԲՀԿ նախագահ Գագիկ Ծառուկյանը կարող է դառնալ ընդդիմության միասնական թեկնածում, Հրանտ Մարգարյանն արձագանքեց. «Թեկնածու կարող է դառնալ, իսկ միասնական թեկնածո՞ւ` չեմ կարող ասել»:

Ըստ ՀՅԴ Բյուրոյի ներկայացուցիչ Հրանտ Մարգարյանի` եթե այդ սկզբունքով առաջանորդվենք, ապա ի սկզբանե եղել են ուժեր, ովքեր դեմ են եղել առնվազն խորհրդարանական կառավարման համակարգին, բայց հանդիպում, միեւնույն է, եղել է: «Մենք չենք խուսափում շարունակել զրույցը, որովհետեւ հավատում ենք, որ խոսակցությունը, շփումը կարող է հանգեցնել համընդհանուր կոնսենսուսի: Միամիտ չեմ, որ կարծեմ, թե նախագահը կարող է համաձայնել, որ այլեւս նախագահ չլինի, ես չեմ հավատում, բայց դա պատճառ չէ, որ մենք այդ հարաբերությունը չունենանք: Նախագահի հետ հանդիպումն իմաստ ուներ, որովհետեւ մեր հիմնավորումները, տեսակետները կարող են ազդել նրա մտածողության վրա: Մեր ծրագրի տրամաբանությունը հասկանալու անհրաժեշտությունը նույնքան կարեւոր է»,- հայտարարեց նա:

Հրանտ Մարգարյանն ընդգծեց, որ եթե ՀՀԿ-ն ընդունի ՀՅԴ-ի յոթ կետերը, շնորհակալ կլինեն, չի ընդունի` գոնե չեն ունենա այն մտահոգությունը, թե ինչու չբացատրեցին: «Լուրջ մարդիկ, լուրջ քաղաքական ուժերը մեզ հասկանում են: Խնդիրն այն է, որ որոշ անձինք, որոնք կարծում են, թե քաղաքականությունը ծայրահեղություն է, եւ որքան ծայրահեղ լինեն, այնքան տպավորիչ կլինեն, սխալ դատողություն են անում»,- նշեց ՀՅԴ Բյուրոյի ներկայացուցիչը:

Նա վստահեցրեց, որ ՀՅԴ յոթ կետերը ո’չ որեւէ մեկի դեմ են ուղղված, ո’չ էլ հանուն մեկի են, հանուն ծրագրի է: ՀՅԴ-ի նպատակն է, որ նախագահական ընտրությունները ոչ թե անձերի, այլ ծրագրերի պայքարի վերածվի: «Մինչեւ այսօր հաջողած ենք, ոչ այն առումով, որ կարողացել ենք ստեղծել համընդհանուր համախոհություն, բայց կարողացել ենք ստեղծել համընդհանուր խոսակցություն: Մենք ուզում ենք ասել, որ ելք կա, ճանապարհ կա»,- նշեց Հրանտ Մարգարյանը եւ հավելեց, որ եթե անգամ չկարողանան ստեղծել համընդհանուր համախոհություն, ինքնին գործընթացն արդյունավետ էր:

Նախագահի հետ հաջորդ հանդիպման իմաստը, Հրանտ Մարգարյանի կարծիքով, ճիգ է, որ կարողանան բացատրել, հասկացնել, համոզել, որ ՀՅԴ-ն ճիշտ է:

«ԵՐԿԻՐ»

Leave a Comment