Հրանտ Մարգարյան. Պետք է ժողովրդին տրամադրել
Posted on December 12, 2012, by admin, under Լուրեր, Հարցազրույցներ.
-Պարոն Մարգարյան, դեկտեմբերի 8-ին Սերժ Սարգսյանի հետ կայացած հանդիպումը ո՞վ էր նախաձեռնել եւ ի՞նչ ակնկալիքով:
-Նախաձեռնությունը մերն էր: Մենք ի սկզբանե ասել էինք, որ բոլորի հետ պիտի հանդիպեինք եւ հանդիպել էինք բոլորին, բացի հանրապետականից: Այդ մի հանդիպումն էլ արեցինք: Եվ էս առումով որեւէ արտառոց բան չենք արել: Հայտարարված գործն ենք արել:
-Դուք նշել եք, որ շարունակելու եք խորհրդակցությունները ՀՀԿ վերնախավի հետ: Քանի որ Սերժ Սարգսյանը չի ընդունել Դաշնակցության 7 հիմնադրույթներից երկուսը, ո՞րն է խորհրդակցությունները շարունակելու նպատակը:
-Եթե էդ ձեւով մենք ուզենանք առաջ երթանք, ես չգիտեմ ովքեր են բոլոր 7 կետերն ընդունել: Ես կարծում եմ, որ ընդհանուր հռետորական բաներ եղել են այդ կետերի շուրջ, բայց ամբողջությամբ ընդունածների մասին ես ստույգ տեղեկություն չունեմ: Այսինքն եթե էդպես լինի, յոթ կետը մենք պետք է միայն մեզ համար գրեինք, որը մեզ համար արդեն նորություն չէր. արդեն 20 տարի է մենք մեր ծրագրի մեջ ունենք: Այսօր ճիգ թափեցինք, որ բոլորին համոզենք, որ երկիրը այդ վիճակից դուրս գալու ախտաճանաչումը անելուց հետո, այդ վիճակը փոխելու համար այս յոթ օրակարգային կետերն անհրաժեշտ են: Եվ ես չեմ կարծում, որ այդ ճիգը անիմաստ գործ է: Վերջապես, հենց առաջին հերթին այն ուժը, որ այսօր իշխանություն է, պետք է հասկանա, որ այն, ինչ մենք ասում ենք, լուծում ունի: Եվ լուծումը մենք իրենց ցույց ենք տալիս: Կուզեն՝ կանեն, չեն ուզի՝ չեն անի: Բայց մեր պարտականությունն է, որ այդ ճիգը թափենք համոզելու բոլորին, որ սա երկրի հարցերի լուծմանը բերող ծրագիր է:
-Սերժ Սարգսյանն ինչո՞վ հիմնավորեց երկու հիմնադրույթների մերժումը:
-Խորհրդարանական կառավարմանն անցնելու կապակցությամբ ասաց, որ սիստեմով չի պայմանավորված երկրի վիճակը. կարող է խորհրդարանական լինի, վատ լինի, կարող է նախագահական լինի՝ լավ լինի: Ես էլ եմ ընդունում, այդպես է: Մեր հիմնավորումները տարբեր են, եւ մենք պատասխանն ունենք այդ հարցի: Բայց ինքն այդպես է նայում խնդրին:
-Իսկ չասա՞ց, թե եթե ոչ կառավարման համակարգի, ապա ինչի հետ է կապում ստեղծված վիճակը:
-Նախագահից հարցրեք, ինքն ավելի լավ կբացատրի, թե ինչի հետ է կապում: Կարծում եմ ուրիշի խոսքը ներկայացնելը անշնորհակալ գործ է:
-ՀՀԿ ղեկավար կազմի հետ հաջորդ հանդիպումը ե՞րբ է լինելու:
-Չենք հստակեցրել: Արմեն Ռուստամյանը երկրում չի, կգա՝ կորոշենք:
-Որքանո՞վ է հավանական, որ ՀՅԴ-ն ընտրություններում սատարի Սերժ Սարգսյանին:
-Դա բացառված է: Քաղաքականության մեջ ասում են չկա անկարելի բաներ, բայց դա բացառված է: Դա չի կարող լինել: Դա վերջնական հարց է: Մենք որեւէ կերպ չենք բանակցում, որ իրեն պաշտպանենք, նման հարց չկա: Մենք թեկնածու չենք փնտրում, որ պաշտպանենք: Իսկ գործող նախագահի պարագայում՝ մենք ընդդիմություն ենք, եւ բացառված է, որ իրեն պաշտպանենք: Էդպիսի բան չի կարող լինել: Եթե լսեք էլ՝ չհավատաք:
-Պարոնն Մարգարյան, շարունակվելու՞ են խորհրդակցություններն այլ քաղաքական ուժերի հետ: Եվ ո՞ր մեկի հետ է ՀՅԴ-ի համար դյուրին եզրեր գտնել:
-Շարունակվելու է: Գիտեք, բոլորն ունեն դյուրություններ, բոլորն ունեն դժվարություններ: Այսօր խոսելու առումով որեւէ մի դժվարություն չունենք իրար ընկալելու: Էդ տեսակ պրոբլեմ գոյություն չունի: Դժվարություններ կան, բայց դրանք անհաղթահարելի չեն:
-Նպատակահարմա՞ր եք համարում, որ քաղաքական ուժերը, այդ թվում՝ Դաշնակցությունը, բոյկոտեն ընտրությունները՝ Սերժ Սարգսյանի վերընտրությունը չլեգիտիմացնելու համար:
-Չէ, դրանից ո՞վ ի՞նչ կշահի: Որ էդպես անենք, ժողովրդի վիճակը կլավանա՞ դրանից, երկրի վիճակը կլավանա՞: Վերջապես մենք ճիշտ է, որ քննադատում ենք, բայց մեր քննադատությունը չպետք է էնպիսի բացարձակ բնույթներ ունենա, որ ամեն ինչ սեւ երեւա, ամեն ինչ հուսահատական երեւա: Ես կարծում եմ, որ դրանից կշահի միայն իշխանությունը, ուրիշ ոչ ոք: Հակառակը, պետք է պայքարի տրամադրես ժողովրդին, որ եթե ճիգ թափես, եթե կեցվածք ունենաս, եթե քո համոզումով քվեարկես, վիճակ կփոխվի: Դա է ճիշտ մոտեցումը: Մյուսը պարտվողական, հուսահատական մոտեցում է, եւ դրանից անպայման մեր ժողովուրդը չի շահի:
-Դաշնակցությունում ովքե՞ր են այն գործիչները, որ պատրաստ են կամք ունենալ եւ նախագահի թեկնածուի դերը վերցնեն:
-Մենք բարեբախտաբար շատ մարդ ունենք համահավասար արժանիքներ ունեցող եւ արժանի քաղաքական ղեկավարի պարտականություններ ստանձնող մարդիկ շատ ունենք: Մենք, ի տարբերություն մնացած կուսակցությունների, լիդեր չունենք, մենք ունենք պատասխանատու անձինք: Կարծում եմ մեր կուսակցությունից դժվար չի թեկնածու գտնել: Միգուցե դա մեզ մի տեղ խանգարում է, որովհետեւ անձ կուսակցությունների ժամանակաշրջան է: Անձինք, որոնք պայմանավորում են կուսակցության գոյությունը: Մեր պարագայում այդպես չի: Մեր կուսակցությունը պայմանավորված չէ անձերով: Դա նաեւ մեր երկարակեցության գաղտնիքն է:
-Մի քանի անուն կնշե՞ք:
-Կարծում եմ ձեզի դժվար չի այդ անունները հիշել, դրա համար պետք չունեմ օգնել: Հանկարծ մեկին կմոռանամ, հետո լավ չի լինի:
-Հետեւաբար, չեք կարող նշել, թե ովքեր կարող են լինել ՀՅԴ հավանական թեկնածուները:
-Պետք չունեմ: Ժողով կլնի, յոթ սարի ետեւ չի, եւ ամեն ինչ պարզ կլնի:
Գագիկ Աղբալյան
«ՀԱՅԿԱԿԱՆ ԺԱՄԱՆԱԿ»
