RedStrong Red (default) BlueCalm Blue GreenFresh Green

Chose your color scheme.

Հրանտ Մարգարյան. ՀՅԴ-ն սեփական թեկնածուն կունենա

Posted on December 14, 2012, by , under Լուրեր, Հարցազրույցներ.

ՀՅԴ Բյուրոյի ներկայացուցիչ Հրանտ Մարգարյանի հարցազրույցը Hayeli.am-ին

-Մամուլում լուր է տարածվել, որ ԲՀԿ եւ ՀՅԴ-ն համաձայնության չեն եկել նախագահի թեկնածուի հարցում, ՀՅԴ-ն հրաժարվել է պաշտպանել Գագիկ Ծառուկյանին եւ առաջարկել իր թեկնածուին, որին էլ դեմ է եղել ԲՀԿ-ն: Սրանից հետո ՀՅԴ-ն հանդիպել է Սերժ Սարգսյանի հետ եւ նրան ասել, որ չեն պաշտպանի Գագիկ Ծառուկյանին եւ չեն առաջադրի թեկնածու: Ինչպե՞ս կմեկնաբանեք այս տեղեկութոյւնը:

-Նստում են տունը, երեւակայական բաներ են ասում: Վերջապես կա «Բարգավաճ Հայաստանի» ղեկավարություն, նա կարող է խոսել: Այդ մարդիկ ովքեր են, որ նրանց անունով են խոսում: Հետո վերջապես ինչու մենք պարտավոր էինք անպայման պաշտպանեինք իրենց թեկնածուին, չեմ հասկանում, ուղղակի: Մենք ոչ մի անգամ չենք ասել, որ չենք պաշտպանելու, ոչ մի անգամ չենք ասել, որ կպաշտպանենք: Երրորդ հերթին`այդ հարցով պետք է խոսեն ոչ թե էդ մարդիկ, այլ պետք է խոսեն պատասխանատուները, ես էլ պատասխան կտամ: Բայց ես սուտ բաներին, երեւակայական բաներին ժամանակ չունեմ պատասխանելու:

-Իսկ ի՞նչ եք կարծում, ԲՀԿ-ն ինչու՞ նման որոշում կայացրեց, քանի որ ամեն ինչ տանում էր նրան, որ Գագիկ Ծառուկյանը կառաջադրվի:

-Չեմ ուզում էդ տեսակ բաներով զբաղվեմ: Ավելի լավ է իրենք խոսեն, իրենք բացատրեն, ես ինչու բացատրեմ: Դա անշնորհակալ գործ է: Թող իրենք խոսեն` լավ որոշում են արել, վատ որոշում են արել: Դա իրենց գործն է, մեզ չի վերաբերվում: Ամեն կուսակցություն ինքն է որոշում: Մենք միշտ բաց ենք աշխատել, ոչ ոք այդքան հստակ եւ բաց չի արտահայտվել եւ ոչ մի տեղ չենք հակասել: Մենք ասել ենք` նախ ծրագրի շուրջ պետք է ստեղծվի համախոհություն, միասնականություն: Երկրորդ`այդ համախոհությունը ստեղծվելուց հետո կարեւոր չի այլեւս ով կլինի միասնական թեկնածուն, բայց այդ համախոհությունը ստեղծվելուց հետո պետք է ճշտվի միասնական թեկնածուն, ոչ թե նախ ճշտվի միասնական թեկնածուն, հետո համախոհություն ստեղծվի: Մենք անձի խնդիր չեն ունեցել, մենք ունենք ծրագրի խնդիր, ծրագրից հետո մենք անշուշտ ունենք անձերի շուրջ մեր նախասիրությունները, հակակրանքներն ու համակրանքները: Բայց դա համարել ենք երկրորդական հարց:

-ՀՅԴ-ն ասել է, որ անձի հարց չի դնում, այլ մոտեցումների հարց է դնում: Արդեն հստակեցվե՞լ են մոտեցումները, եւ արդյոք քննարկվու՞մ է անձի հարցը:

– Խորհրդարանական ընտրություններից հետո մենք նույն բանն ենք ասել, որ մենք անձի հարց չենք դնում, նախ ծրագրի շուրջ պետք է գոյանա համաձայնություն, որից հետո մենք գանք եզրակացության: Եզրակացության գալուց հետո ոչ ոք նման որոշում ընդունելու իրավասություն չունի, մեր Գերագույն ժողովը պետք է որոշում ընդունի: Հիմա մարդիկ կարող են հավատալ, որ մենք կեղծ ենք, սուտ ենք, դա իրենց գործն է, բայց մեր կուսակցության մեջ ժողովն է որոշում: Ուզում են` հավատան, չեն ուզում` չհավատան:

-Քանի որ ԲՀԿ-ն այլեւս դուրս եկավ քաղաքական ակտիվ գործունեության դաշտից` նկատի ունենալով, որ խորհրդարանում պատգամավորների թվով երկրորդ տեղում գտնվող ուժը չի մասնակցում երկրի համար կարեւոր ընտրություներին, արդյոք սպասվու՞մ է, որ ՀՅԴ-ն կարող է դաշինք կազմել ընդդիմադիր դաշտում գործող այլ ուժերի հետ` ՀԱԿ-ի, «Ժառանգության», «Ազատ դեմոկրատների» եւ մյուսների: Կա՞ նման քննարկում օրակարգում:

-Մենք մեր ծրագիրը դեռ ավարտված չենք համարում: Կշարունակենք աշխատանքը, նույնիսկ ԲՀԿ-ի հետ կշարունակենք էդ աշխատանքը: Մենք չենք կարծում, որ ամեն ինչ վերջացավ, ամեն ինչ ջուրն ընկավ, այլեւս ոչ մի բան հնարավոր չի: Մենք մեր գործը շարունակելու ենք, Մեր արածները, մեր կատարելիք աշխատանքը պայմանավորված չի սրա կամ նրա պահվածքով, մենք շատ ավելի սկզբունքային եւ հիմնավոր ուղղություն ունենք:

– Սերժ Սարգսյանի հետ հանդիպումից հետո հայտարարեցիք, որ չեք պաշտպանելու իր թեկնածությունը, բայց եւ չեք բոյկոտելու ընտրությունները: Դա ի՞նչ է նշանակում, կարող է ՀՅԴ-ն իր սեփական թեկնածուն ունենա: Այդ հարցը քննարկվու՞մ է:

-Կարող է, ինչու` չէ:

Նարինե Մեքումյան
«ՀԱՅԵԼԻ»

Leave a Comment