RedStrong Red (default) BlueCalm Blue GreenFresh Green

Chose your color scheme.

Եթե մենք իսկապես ոչինչ ենք, վերջացած, հեղինակազրկված, ո՞ւմ է հետաքրքիր կոալիցիայում ենք, թե ոչ

Posted on January 28, 2016, by , under Լուրեր, Հարցազրույցներ.

3-1-1024x682Հարցազրույց ՀՅԴ Բյուրոյի ներկայացուցիչ Հրանտ Մարգարյանի հետ

Իշխանությունների հետ վարվող Հայ Յեղափոխական Դաշնակցության բանակցությունները նախնական են, որոնց ժամանակ զրույց է ընթացել համագործակցելու մասին: Tert.am-ի հետ զրույցում ասաց ՀՅԴ Բյուրոյի ներկայացուցիչ Հրանտ Մարգարյանը՝ նշելով, թե համագործակցության ֆորմատը դեռևս քննարկվելիք հարց է, բայց «անշուշտ, անհավանական չէ կոալիցիան»:

Հ. Մարգարյանը վստահեցրեց, որ համագործակցության կամ կոալիցիայի կազմման արդյունքում ՀՅԴ–ին տրվելիք պաշտոնների շուրջ քննարկումներ չեն տարվում՝ չհերքելով, որ դրանք արժեք ունեն ՀՅԴ համար:

Ինչ վերաբերում է լուրերին, թե իր հայտարարությունից հետո ՀՅԴ–ի շարքերը նոսրանում են, դժգոհում են ՀՅԴ կառույցները, քանի որ տեղյակ չեն եղել իշխանությունների հետ վարվող բանակցությունների մասին, Հրանտ Մարգարյանը հերքեց՝ ասելով, թե ՀՅԴ-ում նման երևույթներ չկան:

– Օրերս հայտարարեցիք, որ Դաշնակցությունը «սկզբունքորեն» ընդունել է իշխող կոալիցիայի մաս կազմելու ՀՀԿ առաջարկը: Մինչդեռ, ՀՀԿ-ից խուսափում են կոալիցիա բառից՝ օգտագործելով համագործակցություն եզրույթը: Դուք շտապե՞լ եք՝ հայտարարելով, որ կոալիցիայի առաջարկություն կա:

– Ես էլ խոսել եմ համագործակցության մասին՝ ասելով, որ համագործակցության ձևաչափը դեռ ճշտված չէ: Անշուշտ, անհավանական չէ կոալիցիան, դա էլ է քննարկվել վարվող բանակցությունների ժամանակ: Բայց, առհասարակ, խոսք է գնացել համագործակցության մասին, եղել է նախնական զրույց: Ժամանակ է պետք, որ ամեն ինչ հստակեցվի: Պարզապես լրագրողները, իմ նախորդ հարցազրույցը, մի փորք այլ կերպ են մեկնաբանել:

– Այսինքն՝ Դուք էլ դեռ չգիտեք՝ բանակցությունների արդյունքում կոալիցիա՞ կկազմվի, թե՞ կլինի զուտ համագործակցություն:

– Այո, ոչինչ ինքնանպատակ չէ: Ցանկացած որոշում կայացվում է որևէ նպատակի հասնելու համար: Դեռ սկիզբն է, ժամանակը ցույց կտա:

– Իսկ ինչի՞ց է կախված՝ կոալիցիա կկազմվի, թե համագործակցություն կլինի:

– Մի շարք գործոններից. տվյալ համագործակցության մեջ մեր դերակատարության ձևից, չափից…

– Ինչպիսի՞ դերակատարություն է ակնկալում Դաշնակցությունը:

– Դա ներքին զրույցի թեմա է, եկեք հարցը թողնենք բանակցությունների քննարկմանը:

– Պարո՛ն Մարգարյան, «Ռէվելուցիա» հաղորդման շրջանակներում Դուք հայտարարել էիք. «Մենք յոթ օրակարգային կետ ենք դրել, ով ընդունի կհամագործակցենք: Դրանցից 3 կետն այս Սահմանադրությամբ լուծվում են: Բայց 4 կետը դեռ մնում է»: Ինչպե՞ս եք գնում կոալիցիա կազմելու ճանապարհով, երբ 7 կետերից 4-ը լուծված չէ:

– Իրականության մեջ այդ 4 կետերն անլուծելի չեն մնում: Դա գործըթնաց է, այդ կետերը մեկ քայլով լուծելի չեն: Ամեն դեպքում, կարծում եմ, որ նոր Սահմանադրությունը դրել է հիմք՝ լուծելու այդ հարցերը: Կան փոքր խնդիրներ, որոնք, անշուշտ, ևս իշխանությունների հետ զրույցի թեման պետք է դառնան:

– ՀՀԿ-ից հայտարարեցին, որ հայ-թուրքական արձանագրություններից Հայաստանի ստորագրությունը հետ կանչելու վերաբերյալ ՀՅԴ-ի ներկայացրած կետն այս պահին, օրինակ՝ հնարավոր չէ իրականացնել:

– Դրանք մասնավոր տեսակետներ են: Եկեք չշտապենք: Սարերի հետևում չեն արդյունքները, կիմանաք:

– ՀՅԴ-ից պարզապես միշտ ասել են, որ սկզբունքային է 7 կետերն ամբողջությամբ ընդունելը: Եթե այս կետերից որևէ մեկը չընդունվի իշխանությունների կողմից, դուք կկազմե՞ք կոալիցիա:

– Չեմ կարծում, որ որևէ կետ կա, որ իշխանությունները չեն ընդունի: Նոր Սահմանադրության ընդունմամբ հիմնական հարցերը լուծված են: Մնացած բոլոր խնդիրները լուծելի են ընթացքում, մեկ քայլով ու մեկ հարվածով լուծվելիք խնդիրներ չեն: Իսկ նոր Սահմանադրությունը հիմք է ստեղծում, որ այդ կետերի իրականացման ընթացքը մեկնարկի:

– Այս օրերին մամուլը գրում է այն մասին, որ ՀՅԴ-ի բանակցությունները իշխանությունների հետ կոալիցիա կազմելու շուրջ համաձայնեցված չեն եղել ՀՅԴ կառույցների հետ, ուստի Դաշնակցության ներսում դժգոհություն կա: Այդպե՞ս է:

– Զարմանալի է՝ որտեղից են նման լուրեր գրվում, ինչպես են նման ենթադրություններ արվում: Բնականաբար, մենք կենդանի օրգանիզմ ենք, չի կարելի պատկերացնել, որ Դաշնակցության պես հսկա կազմակերպությունը միանման է մտածում: Բայց ես, որպես այս կազմակերպության ղեկավար, չեմ հանդիպել նման երևույթի: Այդ ի՞նչ փաստի են հանդիպել, որ նման եզրակացության են եկել: Սա պարզապես իրենց ցանկությունն է, իրենք ուզում են, որ ՀՅԴ-ում նման երևույթներ լինեն: Մենք նոր ենք ավարտել հիմնական ժողովները և առաջնորդվում ենք այդ ժողովներում կայացրած որոշումներով: Ձեր կողմից նշված խնդիրը՝ ՀՅԴ-ում չկա:

– Խոսակցություններ կան, որ ՀՅԴ-ն ընդհուպ անդամներ են լքում:

– Ոչ մի անդամի մասին, ով լքում է Դաշնակցությունը, ես տեղյակ չեմ: Մեկ հոգի Ղարաբաղից խոսել էր, այն էլ՝ ՀՅԴ-ից վաղուց էր հեռացել: Կրկնում եմ, այդ լուրերը ոչ թե իրականություն են, այլ՝ ցանկություն: Մարդկանց ավելի քիչ հետաքրքրում է իրենց կազմակերպությունը, քան՝ ՀՅԴ-ն:

– Երբ նախկինում ՀՅԴ-ն լքեց իշխող կոալիցիան, եղան հայտարարություններ, որ հիմանական պատճառներից բացի, Դաշնակցությունը դիմել է այդ քայլին, որովհետև ձեր դիրքորոշումը չի ազդել ընդունվող որոշումների վրա: Իշխանությունները չեն փոխվել, ղեկավարում են նույն մարդիկ: Կոալիցիան ձևական բնույթի չի՞ լինելու:

– Իրական կոալիցիա, եթե այն ստեղծվի, կլինի 2017 թ.-ի ընտրություններից հետո, երբ կազմակերպությունները իսկապես անհրաժեշտ լինեն միմյանց՝ պայմանավորված ձայների քանակով: Եթե որևէ կուսակցություն չկարողանա ապահովել անհրաժեշտ 50+1 ձայները, այդ ժամանակ իրական հիմք կստեղծվի կոալիցիա կազմելու: Մենք սա գիտակցում ենք: Բայց մեր մղումը համագործակցելու՝ Սահմանադրությունն է, երկրի դրությունը, տարածաշրջանում տիրող իրավիճակը, սպառնալիքները, վտանգները, որոնք ծառացած են ժողովրդի առաջ: Մեզ համար համագործակցելու, կոալիցիա կազմելու հիմնական մղումը Հայաստանն է՝ հայ ժողովուրդը: Մենք Սահմանադրություն ենք ընդունել, որով կարող ենք լավ սկիզբ դնել երկրի համար: Ամեն ճիգ կգործադրենք, որ այդպես լինի: Եվ եթե սրա համար համագործակցություն է պետք, ուրեմն կգնանք համագործակցության՝ հասկանալով, որ սա այն իդեալական համագործակցության պայմանները չեն, որոնք կարող են ստեղծվել 2017 թ-ից հետո: Մենք չենք առաջնորդվում անձնական կամ կուսակցական շահերով, թայֆայական մոտեցմամբ, մենք երկրի ու ժողովրդի պայմաններով ենք մտահոգված: Ի տարբերություն շատ ու շատ կազմակերպությունների մեզ համար կարևորը Հայաստանն ու հայ ժողովուրդն են, որից դուրս այլ նպատակ չենք հետապնդում:

– Եվ նպատակի համար, որը հետապնդում է ՀՅԴ-ն, Դուք փաստորեն պատրաստ եք վտանգել Դաշնակցության հեղինակությո՞ւնը: Այս օրերին ՀՅԴ հասցեին արվեցին մի շարք քննադատություններ, կասկածի տակ դրվեց՝ ՀՅԴ վարկանիշը, ասվեց, որ լինելով ընդդիմություն մեկ մտնում, մեկ դուրս եք գալիս իշխող կոալիցիայից:

– Մեկ մի անգամ մտել ենք կոալիցիա, մեկ անգամ՝ դուրս եկել, հիմա էլ համագործակցություն ենք փնտրում: Ես չգիտեմ՝ ինչպես են չափում, որ վարկանիշը, հեղինակությունը ընկնում են: Որո՞նք են հեղինակության չափանիշները: Այդ ո՞ւմ վարկանիշն է մեզանից բարձր, այդ ո՞ր կուսակցությունը մեզանից մեծ վարկանիշ ունի: Եթե մենք իսկապես ոչինչ ենք, վերջացած, սպառված, հեղինակազրկված, ո՞ւմ պետք է հետաքրքրի՝ այս կողմն ենք, թե այն: Իսկ եթե այս կամ այն կողմ լինելը մի բան է նշանակում, ուրեմն դու ազդեցիկ ես, հեղինակություն ունես, քեզնից բան ես ներկայացնում: Եթե մենք ոչինչ լինեինք, որևէ մեկին չէր հետաքրքրի՝ որ կողմը կլինենք:

– Կարծիքներ կան, որ ՀՅԴ-ն իր կեցվածքով կասկածի տակ է դնում առհասարակ ընդդիմության ինստիտուտը: Համաձայն չե՞ք:

– Ցավոք, ընդդիմությունը հաջողություն գրանցեց միայն, երբ կազմվեց Քառյակը, երբ միասին աշխատեցինք: Այս երկրում վարչապետ փոխվեց: Բայց անգամ այդ ժամանակ ընդդիմությունը չմնաց հավատարիմ ճշտված ուղուն: Ամեն վայրկյան անհապաղ իշխանափոխություն պահանջելը այն մարդու խնդիրն է, ով զգում է, որ ծայրահեղության չգնալու դեպքում իշխանության չի գա, որովհետև ամեն ինչի հիմքը իր անձն է: Մեր դեպքում այդպես չէ: Մենք որ Քառյակից դուրս եկանք՝ զարգացա՞ն, բարգավաճեցի՞ն: Քանի տարի է՝ այդ կուսակցություններն անհապաղ իշխանափոխություն են պահանջում, իրենք հաջողե՞լ են: Գուցե, վերջապես, հասկանան, որ իրենց ընտրած ուղին սխալ է: Հանրահավաք են հրավիրում, բայց հազար հոգի էլ չի հավաքվում, իրենք հեղինակազրկված չե՞ն: Ամեն մեկն իր արած գործի արդյունքով պետք է գնահատի: Ձախողելն ու գոռալը, որ մյուսներն են ձախողվել՝ ամենից հեշտ տարբերակն է:

– Ձեր նպատակին հասնելու համար, որքան էլ հերքեք, անհրաժեշտ են պորտֆելներ, պաշտոններ: Համագործակցությունից, կոալիցիայից՝ ի՞նչ ակնկալիքներ ունեք այս առումով:

– Ես չեմ ասի, որ մեզ համար դա արժեք չունի: Բնականաբար, ինչպես ցանկացած կազմակերպության համար, այնպես էլ մեզ համար, դա արժեք ունի: Բայց դա մեզ համար նպատակ չէ: Ամենակարևորը սկզբունքների շուրջ համաձայնելն է: Մնացածը՝ երկրորդական է: Այո, կարող ես չլինել գործադիրի անդամ, բայց համագործակցել: Արտաքին քաղաքականության մեջ այս իշխանությունների հետ մենք համագործակցել ենք՝ Հայոց ցեղասպանության ճանաչման, Ղարաբաղի հարցերում, բայց պորտֆել չենք ունեցել: Որովհետև դա չէր կարևոր:

– Դա նպատակ չէ, բայց միջոց է՝ նպատակին հասնելու համար:

– Այո: Չեմ հերքի:

– Ո՞ր ոլորտներում եք տեսնում՝ պաշտոնները: Նախորդ հարցազրույցներից մեկում ասել էիք, որ ՀՅԴ-ն ընդդիմադիր է սոցիալ-տնտեսական քաղաքականությանը: Հնարավո՞ր է, որ պաշտոնները հենց այս բնագավառում լինեն:

– Երկրի համար ամենակարևորը տնտեսական, սոցիալական քաղաքականությունն է: Կարևորն այն է, որ կառավարությունը դառնա ոչ թե չինովնիկների կառավարություն, այլ՝ երկիրը ղեկավարող մարմին, որտեղ հարցեր կքննարկվեն, որ պետական համակարգը բյուրոկրատաթափվի, թեթևանա: Ուստի կոնկրետ որևէ բան ասել չեմ կարող: Երբ ամեն ինչ հստակեցվի, մենք տեղյակ կպահենք: Մենք էլ չգիտենք, բայց թերթերը գիտեն: Ծիծաղելի է…

Տիգրանուհի Մարտիրոսյան

tert.am

Leave a Comment