Հրանտ Մարգարյանը չի բացառում Քոչարյանի ակտիվացումը նախագահական ընտրություններին
Posted on May 11, 2011, by admin, under Հարցազրույցներ, Տեսաերիզներ.
«Դրդապատճառը, որը կակտիվացնի Քոչարյանին, պետք է շատ լուրջ լինի»
«ԱԶԱՏՈՒԹՅՈՒՆ».- Հայ Յեղափոխական Դաշնակցության Բյուրոյի ներկայացուցիչ Հրանտ Մարգարյանը չի բացառում, որ Հայաստանի երկրորդ նախագահ Ռոբերտ Քոչարյանը քաղաքական ակտիվություն ցուցաբերի 2013 թվականի նախագահական ընտրություններին: Սակայն նա կարծում է, որ այն դրդապատճառը, որը կակտիվացնի Քոչարյանին, պետք է շատ լուրջ լինի:
«Չեմ կարծում, որ Ռոբերտ Քոչարյանը ուզում է վերադառնալ եւ իրեն թույլ չեն տալիս: Այդ տեսակը չէ, որ թույլտվության սպասի: Գուցե նպատակահարմարության խնդիր ինքն իր վրա դնում է, որ նպատակահարմա՞ր է այսօր իր վերադարձը, ո՞ւմ օգտակար կլինի, ո՞ւմ կվնասի եւ հաջողության հասնելու ինչքա՞ն հնարավորություն ունի: Գուցե այս հաշվարկումները իր մոտ կան, բայց որ մեկից վախենա, կամ որ մեկից թույլտվություն սպասի, կարծում եմ` չկա», – ասաց Մարգարյանը` ենթադրելով, որ Քոչարյանը միգուցե քաղաքականություն վերադառնա միայն 2012-ի խորհրդարանական ընտրություններից հետո:
Հարցին, թե արդյո՞ք Քոչարյանը հնարավորություն կունենա կրկին նախագահի պաշտոնին հավակնելու, Մարգարյանը պատասխանեց.- «Ինձ թվում է, որ Հայաստանում շանսերը չեն, որ դերակատար են, առայժմ դա այդպես չէ»:
Մարգարյանն ասում է, թե, ճանաչելով նախագահ Սերժ Սարգսյանին, բացառում է, որ իշխանություն-ընդդիմություն երկխոսության արդյունքում իշխանություններ զոհ դարձնեն Ռոբերտ Քոչարյանին, սակայն միգուցե թուլացնեն նրա դիրքերը:
Նրա համոզմամբ` ամենավատը այն է, երբ 2008-ի մարտի 1-ի իրադարձությունները ոչ թե քննության նյութ են դառնում, այլ օգտագործվում` իբրեւ պատրվակ, միջոց Ռոբերտ Քոչարյանի նկատմամբ վրեժ լուծելու կամ նրան վարկաբեկելու համար:
«Չի կարելի ասել, որ մարտի 1-ի մեջ միայն իշխանությունն է մեղավոր, իսկ այս երկրում միայն դրա մասին է խոսվում: Ոչ ոք խոսում, թե ընդդիմությունը իր պահվածքով ինչ մեղավորություն ունի, որ ընդդիմության այդ օրվա ղեկավարությունը դա կանխելու կամ հրահրելու հարցում ինչ արեց: Սա մի փոքր անարդար մոտեցում է, որը ցույց է տալիս, որ մարտի 1-ի դեպքերը ըստ էության չէ, որ կարեւոր են, այլ մարտի 1-ը քաղաքականացվում է եւ քաղաքական հաշվեհարդար տեսնելու առումով է օգտագործվում՚:
Անդրադառնալով բուն երկխոսությանը` Հրանտ Մարգարյանն ասաց, թե չգիտի` ուղղակի երկխոսություն կա, թե` ոչ. գուցե կողմերը շախմատ են խաղում, բայց կարծում է, որ ընդդիմության եւ իշխանության միջեւ կա միջնորդ, որը ունի շահագրգռվածություն: Նա ասում է` թեեւ փաստեր չունի, բայց հավանական է համարում, որ այդ միջնորդը Հայաստանում ԱՄՆ-ի դեսպանատունն է, որը «կարող է բոլորին միացնել»:
Հիշեցնենք, որ օրերս Միացյալ Նահանգների դեսպանատունը «Ազատություն» ռադիոկայանի հարցին ի պատասխան, հերքել է մամուլում հայտնված այն տեղեկատվությունը, թե ՀԱԿ-ի եւ իշխանության միջեւ երկխոսությունը ընթանում է Հայաստանում ԱՄՆ-ի դեսպան Մարի Յովանովիչի միջնորդությամբ:
«Հավատում եմ, որ Ղարաբաղի եւ Քոչարյանի հարցը չի կարող լինի, մտավախություն ունեմ, որ հայ-թուրքական հարաբերություններն են խնդրո առարկան: Եթե արտաքին քաղաքականության առումով Ամերիկան ինչ-որ բավարարվածության զգացում է ապրում Հայաստանի իշխանությունների քաղաքականությունից եւ կարծում է, որ Լեւոն Տեր-Պետրոսյանը իշխանության կողքին ավելի շատ կմղի այդ իշխանությանը դեպի իրենց համար ընդունելի ուղղության, բնականաբար, ԱՄՆ-ը շահագրգռվածություն կունենա: Հայաստանի կողմից ստորագրված պայմանագիրը ավելի շատ Լեւոնի (Տեր-Պետրոսյանի) կողմից է ընդունելի, քան ստորագրող կողմի»- ասաց Մարգարյանը:
Հրանտ Մարգարյանը չի հավատում, որ իշխանություն-ընդդիմություն երկխոսության թեման կարող է լինել արտահերթ ընտրությունների անցկացումը, քանի որ երկու կողմն էլ ուզում է «իշխանության բացարձակ տերը դառնալ եւ ոչ թե կիսել այն: Նրա համոզմամբ` երկխոսությունը ժամանակավոր բնույթ ունի:
«Չեմ չարախոսում, բայց հավատում եմ, որ նրանք իսկապես շախմատ են խաղում, այս երկրի եւ ժողովրդի հետ գործ չունեն: Շախմատի հետեւանքը լինում է կամ պարտությունը, կամ հաղթանակը», – ասաց Մարգարյանը` հավելելով, թե հավանական չի համարում ոչ-ոքին:
Ռուզաննա Ստեփանյան
